Yeh Baarish. Woh Ummeed.

Main shukra-guzaar hoon unn lamhon kaa, jinmein maine kuch aisa paaya, jo likh sakaa. Zehen mein aksar bahut kuch likhte rehta hoon, din-raat, subeh-shaam, aate-jatey, uthate-baithtey, har pal har dum, bas  jab bhi mauka mil jaaye. Par record kar nahin paaya, lekin jab bhi samay mila hai, iss blog ke madhyam se kuch kaha hai.  Likhne mein ek alag hi mazaa hai, jo shayad main kabhi bayaan na kar paoon, lekin itna kehna lazmi zaroor hoga ki yeh bada sukoon deta hai. Mujhko, meri rooh ko! Lambe-lambe din kaate hain, raatein bhi bahut si aur bahut tarah ki dekhi hain, jinmein kal ki koi assurance nahi thi. Bhagwan ko toh dekha nahin kabhi, haan par Maa-Baap hain, jinko uski darza deta hoon, aur likhta hoon. Khushi mein likhta hoon, akelepan mein kuch zyade hi khayaal panap-tey hain, lekin gham ki shyahi ka toh koi jawaab hi nahin, bahut kaam aayi yeh mere likhney mein.

Likhna mazboori hai... Aur fitrat bhi!

----

Mumbai mein monsoon ko sehna ek achievement hi hai, aap maane ya na maane… Har gad.dhe ka hisaab rakhte-rakhte umra beet jaayegi, lekin yeh shehar kabhi nahi ruktaa, ruk hi nahi paata… Chand panktiyan, ussi shehar ke naam:

Is baar ki baarish kuch alag hai,

Boondein toh pehchaan loon,

Aisa hi ashkon se bhiga kuch khat, thodi yaadein,

Kahin tumne kahin dekha hai!

Baarish aate hi iss shehar ko kuch ho jaata hai,

Subah ghar se nikle hi nahin, toh shaam ki chinta ho jaati hai,

Baarish shuru hone se pehle hi, ussey bachne ki  taiyaari ho jaati hai,

Lekin kahan suntee hai kisiki, yeh baarish.

‘Asha’ ek badaa hi zaalim shabd hai, logon ne bahut kuch khoya iske naam par... Lekin chhod pana bada mushkil hai, Bhagwan ki tarah hai, dikhta nahi, par har jagah hai. Log toh yehi kehte hain, accept karne mein bhalaa harz kya hai…

Jaane se pehle koi vaada ya kasam nahi khaai  thi humne,

Khush hoon us baat par, ki 'regressive' nahi the hum,

Lekin jab jab tumhe dhoondhtaa hoon un andheron mein,

Khaali haath hi naseeb hota hai,

Andhera pasand hai mujhe, chhod do mujhe mere makhmali andheron mein,

Meri khamoshi ka sur lagati phirti hogi,

Ummeed tha dono saath kuch gun-gunaenge,

Saath kuch kadam aage lenge, kuch nazmon par guftagoo karenge,

Lekin kaun iss zindagi ke aapa-dhapi mein yeh sab karega,

Kahin 'regressive' ka thappa na laga do tum.

Kehte hain, ummeed par duniya kayam hai…


(Sincere thanks to Guru for helping me out with the editing thanks to my great command over the language)